中國文學DSE心得
文學少人考，又冇人做補習，咁多年黎都比人感覺資源少，雖然合格容易但係攞5難過登天，所以唔少人都卻步唔讀或者drop科。捱到dse既同學仔可能會覺得好迷茫，太多篇章背唔曬，評分標準又模糊，呢篇文章會分享考試心得同埋溫習方法，希望幫到大家。
先講講溫習心得。卷二賞析既範圍係課本篇章同埋課外篇章。考核重點係「賞析」而唔單單係「理解」。同中文十二篇範文唔同，考試唔會淨係考你語譯同埋內容理解，而係會集中問作者既感情、道理、文學手法、寫作背景等等，所以大家唔好以為讀完一篇明左就算。基本上我每一篇都會劃分幾個範疇：體裁、內容、手法。
以《前赤壁賦》做例子，體裁係「賦」，你就要知道蘇軾寫賦既特色例如駢散交錯、文氣豪放等等。內容方面其實就係作者既寫作動機，核心感情、文章內容等等。手法要全部背曬，可以分為結構（章法、前後首尾、起伏等等）、寫作手法（論理、寫景、寫人、情感氣氛等等）同埋修辭手法（用字特色、韻律等等）。當你咁樣將賞析內容整理好，你就會溫（背）得更加入腦。
記得唔好錯過學校既任何一次默書（文學基本上大部分老師都係每三堂就默一次），你每次默書都背好曬，考前已經成為長期記憶，唔會溫得太辛苦。
建議大家順住文學史疏理好每一篇章既年代、體裁、特色、思想（儒？/道？之類），你會發現每一個時期例如先秦、兩漢、六朝、唐宋等等都會有兩三篇，咁就可以搵到對比或者相似，compare去溫。例如《詩經》韻律可以比較新詩《死水》，《鴻門會》人物描寫可以比較《竇娥冤》，因為考試都會咁樣問。
考試方面，文學賞析而家呢個年代唔會太在乎你既行文組織（睇得明就得），亦唔會分上中下品，只要中point就有分。所以我會將題目劃分為內容題同手法題。
內容題即係只問你文章內容，你唔需要背手法好處落去，只需要原文+語譯+歸納就得。
手法題即係除左問你點解，仲要你講埋寫作手法同埋好處（效果？特色？），咁你就需要答原文+語譯+手法+歸納+好處。如果係兩篇比較就一定要寫兼論，即係兩邊一齊compare。
文學係絕對可以Tip題的，但要tip得廣。基本上一年前或者上年考過就呢年絕對唔會考，其餘根據出題年份規律推測就得，基本上只需要背10篇左右就得。我個人係唔溫白話文的，因為白話文比較難吹水、難背同埋課外篇章容易睇唔明，但文言文係比較容易睇得明背後既思想感情（對我黎講），所以我只溫文言篇章，到時考亦只揀問文言既個兩題。
多啲操試題庫、會考、dse past paper，同埋抄書！抄下抄下就會熟，抄下賞析，唔好諗住淨係point form記keywords，你考既時候只會詞窮。
跟住到卷一創作，作文同中文分別好大，可以玩既藝術手法都多好多，但切記一定要扣題，最好你啲描寫記敘同思想昇華都exactly係講緊題目個字眼，咁就最穩陣，千其唔好當題目字眼係一個引入或者裝飾。同埋文學作文唔鍾意你寫太雞毛蒜皮既事，就算係日常小事都好，你都要有一定既體會，最好上升至社會議題，可以抒發對社會問題（教育/人生/文化/家庭，但唔好政治）之類既反思，咁就會容易高分。多啲運用意象去代表你既情感轉變，個人比較鍾意用嘢食嘢飲，尤其係「酸+甜」或者說「甜+苦」個啲，可以好好套落唔同既主題，或者用「活化石」雖然滿佈塵埃但曾經也是「生命」去講探索深層既美好之類（考完嗰陣以為自己太隱晦，結果技巧8/10，記得相信自己！只要扣題，有解釋，考官睇得明就得！）
平時生活之中可以諗多啲意象去激發創意，例如一隻碟原本係用於盛載食物，碎左之後就可以傷害人，可唔可以講到人本來可以好有價值，一旦受到撕裂就會變得有攻擊性…之類之類，可以好無聊，唔需要係乜特別嘢，生活百物，皆可取材，但當然唔好太狂魔，某一日變到同屈原一樣「被髮行吟」就……
讀文學工作量大，但正所謂「文學虐我千百遍，我待文學如初戀」，呢科雖然冷門，但我會話係真係「一分耕耘一分收穫」，最緊要諗清楚你「耕耘」既方法係咪啱路，如果唔係只會浪費時間同心力。
補習服務為每班 1-2 人，每班 $1000/1堂2小時，如有需要請聯絡 寫文巴 代為聯絡指導導師。