申請人係咪被錄取，完全由9間大學聯招辦法參與嘅學校同SSSDP資助計劃學校（唔係大學聯招處）獨立決定。大多數科目都會睇考生嘅公開試成績（包括會考、高考、文憑試）嚟評估，有啲科目會留意考生嘅面試表現同埋校外活動等。大學聯招嘅電腦系統會將科目評分排位，同時比對考生嘅科目名單次序，派最高排位嘅科目嘅 offer。
首先，各間院校將會對各位有意報佢果科嘅申請人進行綜合評分，包括上述講嘅 DSE 成績、 OEA 、 SLP 、校長推薦、其他語文科學術成績、排 choice banding 等等計分，得出由最高分至最低分。呢個時候，有部份科目會完全唔考慮排咗 band B 或以下嘅同學，所以大家排 choice 要睇埋該科往年是否有 intake 過 Band B 或以下同學。呢個資料喺 JUPAS 官網有寫，如果你 unsure 亦可以 telegram 寫文巴 幫你睇。
9間院校同 SSSDP 課程將呢個排咗由高至低分嘅人名表會 send 返去聯招處，比聯招處嘅電腦 programme 進行遴選。
冇錯，係一個電腦 programme 自動根據你哋嘅高低分派位，唔係一個人或一堆人。所以如果你嘅 Main Round Offer 唔符合你嘅理想， email 聯招處係冇用，因為唔係人負責，而係電腦已經計算咗最優解，任何一個改變都牽一髮動全身。你嘅 Main Round Offer 不理想只係因為你嘅成績或其他表現比起其他申請人差，或者你排 choice 策略唔夠好導致你派唔到心儀學科，派 A1 唔係老奉，派唔到 A1 唔係聯招處出錯。
遴選機制就好似你當年中三學校揀 elective 咁，最高綜合評分嘅同學會成功入讀 A1 ，之後就到綜合評分第二高嘅同學選擇，佢都可以入 A1 ，如果 A1 學額已滿，就 A2 ，如此類推。
模擬遴選示範請見 JUPAS 官網： https://www.jupas.edu.hk/tc/page/detail/648/ ，建議較1.75倍速，由3:47開始睇。
由2023年起，大學聯合招生遴選分為兩個階段：正式遴選（ Main Round ）同補選（ Clearing Round ）。如果喺 Main Round 冇被取錄嘅考生，就會進入補選階段，考慮返有剩餘學額嘅課程。如果喺呢兩個階段都冇被取錄，學校會睇考生嘅資格，考慮係咪要收返入尚有學額嘅課程，不論係唔係喺考生嘅課程名單入面，而考生唔需要再向學校申請。即係你雖然冇揀我果科，但你冇書讀我可憐下你啦。考生可能喺呢個階段有多個取錄資格，但只可以接受一個。
喺正式遴選或者補選被取錄嘅考生，都要繳留位費同完成註冊先算係接受取錄；如果唔完成嘅話就算係放棄，當年就唔會再有學校收返佢哋入聯合招生嘅課程。
因為考評局公佈覆核成績結果嘅日期係喺正式遴選之後，如果考生申請覆核成功提升咗成績，就可以向聯合招生處申請重新考慮，不論係咪喺正式遴選被取錄。考生可以再改變自己嘅課程名單，就好似公開試放榜之後嘅免費改選，但係如果喺正式遴選被取錄嘅話，就唔可以刪除呢個課程，亦都唔可以將佢排喺第一位。考生會被考慮喺課程名單入面排喺正式遴選被取錄課程之前嘅課程。如果考生某個課程嘅評核結果比正式遴選最後一位被取錄者高，就可以被取錄，唔論額滿唔額滿。如果考生獲得更好嘅取錄資格，就會取消原本嘅取錄，考生可以向原本嘅學校申請退款。
1. 如果申請人A將某個科目排第一，而申請人B成績較好，將同一科目排第三，邊個會先被錄取？
正式揀人之前，9間大學聯招同SSSDP資助計劃只係大概知道申請人揀咗啲咩科目，唔係知道實際排名。申請人揀嘅科目會分入五組。喺呢個例子度，學校唔知A放第一定B放第三。對學校嚟講，呢個科目係A組。
即係如果淨睇 DSE 成績，係會揀咗 B同學先，但如果仲有位， A同學都會入到 A1 。
怛係申請人嘅位置唔單止睇香港中學文憑成績，仲睇其他因素（例如：表現喺面試或測驗、揀科目組別、同年揀同科目嘅人成績同報名人數、填寫網上表格嘅資料等），所以答案係唔知。因為可能 A同學 interview 表現好過 B同學，好到高分過佢哋 DSE 成績嘅差異，咁就會 A同學揀先。
2. 如果申請人得到 Main Round Offer 但又接受咗非聯招嘅課程派位，佢可以點樣退費？
根據 JUPAS 官網 FAQ ，呢位同學應該聯絡非聯招嘅學校。嗱，唔係我叫你哋又報 JUPAS 又報 Non-JUPAS 都可以兩邊都有 offer 架﹐係官網咁寫架！