自細家長、師長都貫輸一定要升讀大學，但有冇諗過有啲人讀咗都係 quit ？ 如果係咪都會 quit ，不如唔好讀，讀兩年副學位直接出嚟做嘢或者讀完中學就出嚟做嘢。所以我哋要判斷自己適唔適合讀大學。
有啲人可能喺學業方面唔係咁出色，可能對書本知識冇興趣或者喜歡其他嘅技能同興趣。如果你喺中學已經唔鍾意做功課同溫書，咁讀到大學又點會忽然鍾意？大學嘅課業比中學繁重好多，你見到果啲好輕鬆地讀嘅人只係好少數。而且中學可以到考試前先發力，但大學係每份功課都計分，絕對唔可以放鬆。有啲人話出嚟做嘢會懷念大學生活，但係而家社會根本唔一定要選擇打工，工作多元化可以選擇適合自己嘅工作，工作又點會比讀書時唔開心呢？
仲有啲人可能已經有一啲技術或者專業技能，或者佢哋覺得其他途徑更適合自己發展。佢哋唔需要透過大學教育嚟達到自己嘅目標，可以直接學師或者讀 VTC 、副學位，都會快過大學走學術路線。呢啲包括咗運輸行業、美業等。有啲人15歲就學師，到人哋22歲大學畢業佢已經係幾間店嘅老闆。
喺大學你會遇到不同挑戰，例如仙制、亂比分嘅 prof 仲唔似專上學院咁有得 appeal 。唔叻又搶住份 project 嚟做果啲谷微已經不在話下，果啲副學位都有。各種外來挑戰可以令到你就算 DSE 30 分都 third hon 。
喺現今社會，大學唔係每個人嘅必然選擇，唔同嘅人有唔同嘅路可以行。重要嘅係要了解自己嘅興趣同才能，同埋明白自己想要嘅生活目標係乜。有啲人可能透過其他途徑，例如技術學校、職業培訓或者自學，都可以達到成功同幸福。
但有一種人可能以為自己唔適合讀大學，但係我無論如何都建議佢讀嘅，就係有家庭經濟情況唔容許佢哋讀大學嘅人。唔好以為 grant loan 同綜援可以拯救全世界，有啲人屋企等住佢出嚟做嘢比家用的。千祈唔好因為經濟原因放棄讀書，出嚟 gap year ，搞掂屋企情況就借政府錢讀 u 啦。 Gap year 唔可恥，既然你 gap 定唔再讀書都係即刻出嚟做嘢，點解唔過幾年讀返書呢？ DSE 成績係終身有用，你做嘢幾年唔駛再考過 DSE 先入大學的，可以用返當年成績。
喺選擇人生路途嘅時候，最重要嘅係要有清晰嘅目標同堅定嘅信念。無論揀擇咗邊條路，都要有決心同努力，相信自己可以達到想要嘅目標。每條路都有困難同挑戰，但係只要堅持努力，就一定可以克服困難，走向成功。希望每個人都可以喺自己嘅人生路上找到最適合自己嘅方向，達到自己嘅夢想同目標。