過去一年有遇過同學 turn down 咗 main round offer 因為唔夠靚，諗住有 clearing round offer ，結果佢要讀 asso 嘅故事。 如果你足夠熟悉 JUPAS 制度，就唔會發生呢件事。今日就嚟講下 main round offer 同 clearing round offer 分別係啲咩。
Main Round Offer ：
獲得正式遴選取錄資格的申請人只會獲得一個課程的取錄資格。該取錄資格會是：
1. 教資會資助課程；或
2. 都大自資課程；或
3. SSSDP「資助計劃」課程。
申請人獲得的正式遴選取錄資格屬申請人於同一學年（2024至2025）內最優先及惟一而又符合取錄資格的課程，並且是其課程選擇名單中排列最高的取錄資格。
獲得正式遴選取錄資格的申請人，不論接納或放棄該取錄資格，於同一學年（2024至2025）內，將不會再被取錄入讀任何可經「大學聯招辦法」選報的課程。
其實 JUPAS 官網係咁寫，唔知點解有啲人冇睇。但可能你睇唔明書面語，以下用人話再解釋一次。
Main round offer 係你最高 banding + ranking (「最優先」) 而且係本年唯一嘅 offer 。本年唯一即係你 turn down 咗都唔會喺 clearing round 有多個 offer。
Clearing round offer ：未獲得正式遴選取錄資格 (Main round offer) 的申請人，可能會從其課程選擇名單中獲得一個課程的取錄資格。該取錄資格會是：
1. 教資會資助課程；或
2. 都大自資課程；或
3. SSSDP「資助計劃」課程。
申請人獲得的補選取錄資格屬申請人於同一學年（2024至2025）內最優先及惟一而又符合取錄資格的課程，並且是其課程選擇名單中排列最高的取錄資格。
即係不論 Main Round Offer 定係 Clearing Round Offer 都係唯一一個 offer 。點解佢唔會好似 non-jupas 咁樣有多於一個 offer 呢？
因為non-jupas 係院校各自收生。例如中大同港大係冇聯絡嘅，佢哋互相唔知對方有比 offer 你，所以你有機會收哂兩間嘅 offer 。而jupas 係聯合招生，即係一個獨立機構去安排最優解。
根據考評局數據，2024 年 DSE 學校考生有 43,295 人，自修生有 7,508 人。而 2023 年 JUPAS Band A~E 夾埋只有 16,149 人有 offer (執筆當下2024年未放榜) 。5萬幾人考，得16XXX個學位，最優解又點會有一個人有兩個 offer 呢？ 即係話根本學位少到唔夠比每人一個，所以更加唔會有人有兩個！
但當大家都知 turn down main round offer 都唔會有第二個 offer 嘅時候，其實 turn down 嘅人係好少。其中一個 turn down 嘅可能原因係最後決定去外國讀書 etc. 少人 turn down main round offer 亦意味住 clearing round offer 嘅數目都會好少。
至於點解有啲人會 Main Round 冇 offer ，甚至乎 clearing round 都冇 offer 呢？好有可能因為你考得唔夠好。但可能有啲 case 唔係喎，考得都有舊年 median 個分，點解 main round 冇 offer / 冇 A1 嘅？咁有可能係你排 choice 排得唔好。排得唔夠好真係一個唔覺意就由A1 跌到落 E ，所以排好 choice 係有策略嘅。 關於個策略請見 另文 。
你可能會覺得好唔公平，點解考到 median 成戈績但只係因為排得唔靚就收唔到心儀學科取錄，點解唔可以考到 median 分數就一定 offer 到。咁係因為學額係有限嘅，唔可能所有到 median 嘅人都入到， 人人都排 A1 ， A1 都會爆。而香港係一直實行精英制度，唔係人人有大學讀。呢個精英亦包含你有幾識用策略，識唔識跟遊戲規則玩。