喺研究 JUPAS 嗰陣，要用好多 Assumption 同 Prediction ，不論係宏觀定微觀嘅層面，所以點樣 set assumption 影響好大。
首先講微觀，微觀即係自己嘅成績/分數/表現，大家手上只有 學校 mock 分數、補習社 mock 分數同埋 IETLS/GCE 等成績（如果有嘅話），最重要嘅係要準確預測 DSE 成績。有啲學校會出 predicted grades 但係唔可信，因為佢按你平時表現 pre ，但只有你本人先知你出咗幾多力。例如我學校 pre 我數學1，但我最後拎 4 ，學校 pre 我英文 5** ，但我最後得 5* 。
我會喺唔同時間預測：
1. F.5 Final（即填JUPAS嗰陣嘅預測）
2. F.6 Mock
3. 考完 DSE 嘅10日內
4. 放榜前
F.5 嘅 Final 成績係客觀嘅，可以用客觀嘅資料揀 20 科出嚟，當然，呢 20 科有啲會係 Dream ，有啲會係水泡，我認為 F.5 可能有啲人未盡力，但 Final 高估成績嘅情況唔算太多。F.6 Mock可以用校內/補習社嘅，最好兩者用哂取平均，但如果有出入，補習社 mock 會準啲，因為涵蓋全港不同區同學。呢個係每個人對整個課程嘅考核成績，比F.6 Final準確。
喺考完 DSE 嘅10日內，好多同學都會上網核對答案，而佢哋對試卷嘅記憶亦相當清晰，所以喺呢個時候預測係最準確嘅。而喺放榜前做嘅預測通常只係用嚟考慮喺唔同情況下嘅用途。
除咗成績外， interview 表現同 sub-system 都會影響自己嘅分數，所以，大家又要「估」自己嘅 interview 表現。有啲科比較睇 interview ，有啲科冇咁睇，大家要聽多啲師兄姐講，另文有各院校 group links 。
宏觀嘅 assumption 包括 market expectation ， inflation 等。 Inflation 我喺前幾章已經講過，反而 market expectation 比較容易「估」，因為唔同嘅經濟環境/事件/消息等都會影響一個人嘅意志，尤其係社會上嘅氣氛，更容易改變考生嘅選擇。例如市道好有好多人會跑去讀BBA，市道差又突然冇人去讀咗。我哋只可以靠自己嘅主觀去武斷地評價呢啲因素對收生嘅影響。當然，唔同學科對於 market expectation 嘅影響有大有細，例如對 HKU Law 嘅影響則極低。
最重要嘅可以話係 luck ，即運。運係無法預測嘅，但我哋簡單地可以將佢量化，由一個分數變成一個有上下限嘅範圍，從而去做最好以及最壞嘅打算。
可以將F.6 Mock +1 個 grade 做 DSE 嘅目標，因為升1個 grade 唔難，但升2個 grade 就難得多。