大學畢業後，好多人都會面對呢個抉擇：係繼續升學定係即刻踏入職場？每個人嘅情況同需求都唔同，所以揀擇都要視乎個人嘅目標同情況嚟做出。
首先，唔好咁老定你一定升到學，最後出嚟成績係點都唔知。其次，唔好咁老定揾到工，市道差，就算揾到，都可能係伏工。如果你去埋 grad trip 先出 offer 都可能係伏，8月先請你更加伏。
咁就問返你係三大定五大定自資大學，因為唔同大學計 hon 升學都唔同。
升學分 taught pg 同 research pg ，即係 MA 、 MSc 同 Mphil 、 PhD 嘅分別。 Taught 以往係比錢就有得讀，但而家都唔係，因為有好多內地生嚟爭位。好多人讀 taught 係為洗底，所以都會考慮三大。如果你係三大，親生仔 second low 就報得，非親生 second up 都可以。 如果係五大，就要 second up 最好 first hon 。唔建議讀完 bachelor 即刻讀，因為咁樣遲人哋太多畢業，建議出嚟做 full time 一兩年再讀，工作經驗比較可以累積到你下份工，而唔會成為僱主眼中為咗逃避工作而 keep 住讀書嘅人。
Research 方面，三大 first hon 可以有機會直升 PhD 。 Second Up都可考慮原校升 Mphil 。 Mphil 嘅 studentship 比 PhD 少，不少人視佢為 PhD 嘅踏腳石 (出國讀書嘅踏腳石) 。至於 second low 都可以考慮入返五大讀 Mphil 。 Research pg 係為想喺 academia 發展嘅人而設，所以冇話五大就洗唔到底。你讀到本身已經好洗底。而五大的話都係唔會入得返三大讀 rpg ，可以 first hon 試下有冇 phd 冇就 mphil ， second up 可直接 mphil ， second low 建議去三大讀個 taught 先讀 mphil 。而上述只係比個方向你揾老師，因為 rpg 最緊要係有冇老師受你份 proposal ，有老師受你咩成績都可以讀，所以寫份 proposal 揾老師啦。
而如果你選擇即刻踏入職場，亦唔係一個錯誤嘅決定。如上文所述，工作可以比多幾年時間你諗升學讀 taught 定 research 、讀邊科。而且 Academia 係一個好大競爭嘅世界，讀到 Mphil 未必讀到 phd ，讀到 phd 未必做到大學講師更遑論 professor 。所以就業會比 academia 發展嚟得快同確定。透過工作，你可以學到好多書本上學唔到嘅實際經驗，同時亦可以建立人脈同培養職業技能。不過，踏入職場都要面對唔同嘅挑戰，例如適應新環境、處理工作壓力等等。但係，透過工作，你可以發掘自己嘅潛力同興趣，同時亦可以積累實際工作經驗，為將來的發展打好基礎。
總括黎講，大學畢業後係升學好定做嘢好，係一個視乎個人情況同目標嚟決定嘅事。無論揀擇邊個路，最緊要嘅係要堅持自己嘅目標同努力追求，相信自己，就一定可以走出一條適合自己嘅道路。