當你踏入工作嘅時候，制定一個清晰嘅個人職業發展計劃就好緊要。呢樣唔單止有助你設定目標，仲可以幫助你更有條理地向前發展。以下係一啲有關點點樣制定個人職業發展計劃嘅建議：
首先，你要知道，喺呢個平均壽命可達100歲嘅年代，我哋可能唔只一個行業做一世。如果一啲平均啲嘅行業，起薪點約2萬，咁頂薪都係7-8萬，你可能會想中途再進修，轉一個行業吸取經驗，再 combine 兩種 expertise 去突破本身個頂薪。所以你要規劃好你打算畢業果個行業做幾耐（未必到頂薪你就再進修轉行），例如由22歲做到35歲，花2年進修，再由37歲做到52歲就財自退休，類似咁樣。咁樣你就可以規劃退休資金除返開每年、每個月應該儲幾多錢了。暫時唔需要規劃到時進修啲咩住，因為隨住時間過去會有新嘅科目同行業興起。但可以考慮自己用幾多年時間喺第一行度達到幾多月薪或年薪。當然呢個只係好籠統地分界，事實上又唔一定要full time讀書甚至唔一定要讀先可以轉行，你亦都可以規劃例如22-35歲第一個行業，當中30-32歲學習轉型，32-35歲第一二行overlap，35歲開始就專注發展第二行，42歲退休，諸如此類計劃。
其次要明確自己嘅價值取向。你可以唔一定要以興趣為事業，因為好多以興趣為事業嘅人最後都冇咁鍾意個興趣，又有好多鍾意工作嘅人未必係做緊佢嘅 hobby 。但係你需要知道自己嘅價值取向，即係你 prefer 啲咩，如果有一連串嘅選項，你會點排，個準則係咩。你又需要知道有咩係你唔鍾意但接受到，又有咩係你唔鍾意到接受唔到，因為現實中係未必有你好鍾意嘅工種同同事比你㨂，只有你接受到嘅幾鍾工作環境比你㨂。
再者，評估自己嘅現況同能力。了解自己嘅優勢同劣勢，同埋確定需要提升嘅技能同知識。除咗講求你接受到做咩工之外，世界都好現實，佢想你做咩工先。可能你煮餸有80分，畫畫有60分，唔代表你會做煮餸嘅工，因為可能其他廚師煮餸有100分，但其他畫家畫畫只有40分。所以我哋係要以相對優勢揾工，而唔係絕對優勢。呢樣有助制定實際可行嘅目標，同埋確保你喺職業生涯中持續成長。
另外，建立一個學習同成長嘅計劃。唔斷學習同提升自己嘅能力係職業發展嘅關鍵。你可以參加培訓課程、閱讀相關嘅書籍或尋求導師指導，以幫助你唔斷進步。參加課程可以係升學或者讀文憑或者證書課程。升讀 master 學費比較貴，要考慮清楚係咪對事業有幫助。而讀專科 high dip 轉型係一個抵玩嘅選擇，唔需要因為已經有個 degree 而抗拒。
唔好忘記建立一個支持你嘅網絡同關係。喺職業發展嘅過程中，有啲時候係需要其他人嘅幫忙同支持嘅。所以，建立一個良好嘅人際關係網絡，同同事、上司、朋友、甚至係業界嘅專業人士保持聯繫，可以幫助你喺職業生涯中更加順利地前進同成長。識多幾個人，唔知幾時會幫到你。
最後，定期檢討同調整你嘅計劃。職業生涯係一個不斷變化嘅過程，你嘅目標同情況亦都會隨時間而變。所以，定期檢討你嘅計劃，同埋根據需要調整，以確保你喺職業生涯中保持順利。
制定個人職業發展計劃需要時間同努力，但會幫助你更好地掌握自己嘅職業生涯，實現自己嘅目標同夢想。
希望呢啲建議可以幫到你制定一個有效嘅個人職業發展計劃，順利達成你嘅目標同夢想！如果有任何問題或者需要更多幫助，都歡迎隨時入 group 同我傾計。