兼職又好少錢…炒散要排更排到好 full 先夠錢駛…全職又好冇自己時間，好想辭職…你有冇考慮過半職？近年半職工作嘅興起備受矚目，呢種工作形式係指每星期工作時間大約係全職工作時間嘅一半。人們開始越來越重視工作與生活之間嘅平衡，半職工作成為一個受歡迎嘅選擇。特別係對於想要有更多時間處理家庭事務、追求個人興趣或學習新技能嘅人來說，半職工作提供咗一個靈活嘅工作選擇。如果你想有穩定收入，但又可以輕鬆自由，半職 + 炒散/創業係一個幾好嘅選擇，有一份收入為你嘅生活費打底，其餘時間就係自己嘅，可以賺取一份高但唔穩定嘅收入。
我最初接觸到半職係喺教育行業，我覺得呢個安排好好， mother friendly ，但無奈係教育行業以外，香港並唔流行半職工作。主要可能有幾個原因。首先，香港係一個繁忙嘅都市，工作節奏快，好多人習慣長時間工作，追求更高嘅收入同事業發展。呢種文化令人普遍較難接受縮減工作時間嘅概念，因為喺香港社會中，長時間工作被視為一種成功同成就。就係一種病態嘅奴性，人哋歐美國家都開始流行4天工作週，但香港仲未得。
其次，香港嘅樓價高昂同生活成本亦係一個考慮因素。雖然近年樓市跌咗，但仲係有好多人以為一定要買樓，於是佢哋會想要一份可以過到壓測嘅收入。就算唔係買樓，好多人都需要全職工作嚟應對高昂嘅生活開支，包括屋租、食物同其他日常開支。因此，唔少人可能覺得半職工作喺經濟上唔夠穩定或者無法應對生活所需。
再者，因為半職每週工時大概24小時，根據香港法例，僱主係要支付相應嘅福利。好多香港僱主就會覺得既然都要比福利，不如請個全職；如果唔想出咁多錢，不如請兼職唔駛福利，所以香港就好少半職嘅職缺喇。
另外，香港嘅勞動市場競爭激烈，好多行業都要求高效率同高度專業化。喺呢種情況下，一啲公司可能更傾向聘請全職員工，因為佢哋可以提供更長嘅工作時間同更高嘅承諾。但係近年已經有部份專業，例如護士、社工、中醫開始請半職。
我一般見到嘅半職工作可能係返 5 個半日 (例如補教行業或者係行政工作，而且呢兩者可以一齊返，如果你係唔想對住一個職場太耐會有壓力，可以選擇星期一至五早上返文職，下午返補習社)，又或者係 3 個全日 (例如護士、社工、中醫等專業工作，需要全日工作)。有啲工作寫返 4 個全日，都叫半職，我諗係奴性重嘅香港獨有。
半職工作有好多好處。首先，佢可以提供更靈活嘅工作時間，令你可以更好地平衡工作同生活。例如，如果你係一個照顧家庭嘅人，半職工作可以俾你更多時間照顧家人同執行其他家庭職責。而對於想要追求其他興趣或學習新技能嘅人嚟講，半職工作可以俾你更多時間追求自己嘅興趣同培養新技能，提升自己嘅競爭力。
其次，半職工作可以減輕工作壓力同提升工作效率。相對於全職工作，半職工作嘅工作時間較短，可以減少長時間工作帶嚟嘅壓力同疲勞感。呢樣可以令你喺工作時更加專注同高效率，提升工作表現同生產力。好似我咁，我接受到長工時，但接受唔到日日都返同一個職場。咁我就可以返兩份半職，星期一三五一間，星期二四六另一間，就唔駛日日對住同一班同事。
最後，半職工作亦有助於減少失業風險。如果你擔心失業或者想要降低工作風險，半職工作可以俾你一個機會同時保持穩定收入同減少失業風險。如果你 full time ，轉工一係裸辭，邊做邊揾都好大 burden ，但係如果係半職，工作與工作之間可以有少少 overlap ，又或者揾工期間都有收入，又唔駛攞假見工比人知或者收工去見。即使喺半職嘅情況下，你依然可以保持一定程度嘅經濟穩定同自主性。
半職工作喺香港雖然唔係主流，但係一個提供靈活性同平衡工作生活嘅好選擇。佢唔單止可以減輕工作壓力同提升效率，仲可以提供穩定收入同減少失業風險。喺一個繁忙同高壓嘅社會度，半職工作係一個值得考慮嘅工作模式，幫助你擁有更多時間追求個人興趣同照顧家庭。當你開始考慮職業生涯嘅下一步時，不妨留意半職工作嘅機會，為自己打造一個更加平衡同充實嘅生活。
以下幫大家收集咗一啲半職嘅職缺，大家自己考慮 (呢篇文章寫咗就未必會更新，如果過咗期，大家可以按以下例子自己揾)
Enlightening Education 半職幼兒中心導師/助理
高中補習社中文科教學助理 ( 半職 ) (一星期 4 日)