可能你都會聽過，揀科揀興趣，入去讀先發現冇想象中咁鍾意；揀興趣做工作，結果變咗一台工作機器，由鍾意變唔鍾意……其實有啲嘢你餘暇時間鍾意冇壓力咁做，唔代表你鍾意受薪被迫做，仲要上面有個人指指點點嘅。揀一個「可以學嘢嘅工作」、「自己擅長嘅工作」，最後都可能因為唔鍾意比人說教而唔鍾意。精讀10萬本科學論文，曾訪問6百多名外國學者同醫生嘅科學暢銷書作者鈴木祐就寫咗「科學的適職」呢本書，綜合4021篇研究結果，提出咗揀工作嘅一啲常見 mistakes ，以及可以揀到天職嘅5個 criteria 。以下我會將呢本日文書嘅要點用中文簡介比大家：
有時候會發現，我哋嘅興趣同埋適合自己嘅工作唔一定係一樣嘢。有啲人可能好鍾意某樣嘢，但係當將佢變成一份工作嘅時候，就會發現唔係咁容易同舒適。興趣係一樣重要嘅嘢，但係唔係所有嘢都適合變成工作。有啲興趣係可以係業餘時間發展，同時擁有一份穩定同舒適嘅工作。有啲人係需要將兩者分開，先可以調控壓力。如果嗜好變工作，當工作有壓力嘅時候連減壓嘅窗口都冇埋。
好多人一味追求高人工嘅工作，但係高人工唔一定代表工作會令你滿足同開心。高人工可能辛苦到仆街。有時候，選擇一份薪酬合理但係讓你有成就感同滿足感嘅工作，可能工作量同壓力水平更加合適。
有啲人會根據行業或者工種嘅前景去揀工作，但係行業前景都會變。就算果行欣欣向榮，都唔保證唔會越嚟越多人做，競爭變大。而且唔係個個升到職，行業前景只係大環境，唔一定代表你會喜歡同埋適合喺度工作。
有啲人會揀似乎輕鬆嘅工作，但係輕鬆唔代表就會滿足同開心。輕鬆可能會太悶，尤其係咁仲可能會駛多咗錢。而且呢啲工作通常人工都不怎麼樣，好難令你對工作有歸屬感。有時候，挑戰同成長先係真正令人滿足嘅。
相信大家都做過一啲生涯規劃 test ，會話你知你適合做咩工。我細個嘅時候佢話我適合做畫家、漫畫家、小說家等等嘅藝術工作，可能因為我有創意同埋鍾意表達，但大咗發現完全唔適合，因為我好唔鍾意 deadline ！我依然有創意同鍾意表達，所以揀咗做補習老師同 copywriter ，而呢兩種工作喺細個啲 ap test 嘅任何一個 category 都冇，充其量只有日校老師， which is 喺另一個 category 。呢件事話比我哋知，呢啲 test 只係有一啲好籠統嘅職業，甚至已經唔 update ，亦都過於非黑即白咁樣分類不同行業，所以唔係一個好嘅揀工作指標。
你想夾，但呢個冇具體條件點為之夾，多數係你估佢夾再列出點解你覺得會夾，但會忽視好多果份工嘅缺點，都係唔客觀嘅。加上未入去做，根本好難知佢全貌係點，所以揀工作適宜用一啲更加可以量化嘅指標多過夾唔夾，具體嘅指標起碼可以喺 interview 嘅時候問 interviewer 去得出正確與唔正確嘅答案吖！
「科學的適職」呢本書指出，一開始對工作冇乜期望嘅人，反而後來可能工作滿足度更高。情形有少少似以前盲婚啞嫁，對對象冇期望，反而婚姻滿足度高啲，少啲離婚；而家對象係自己揾嘅，反而有唔妥就離婚。我哋對「想像嘅工作」嘅答案，同埋性格測試對於測試者適合做嘅工作，係喺有限嘅工作裡面列舉出嚟。而事實上工作可以有無限咁多種，冇嘅話可以你創出嚟；就算同一工種，喺唔同嘅公司做，工作滿足度都可以會有唔同。所以我哋做一份工或者見一份工嘅時候，最好唔好有事先嘅期望。如果太想像到我哋想做嘅工作係點，就會好注意到現實嘅工作同理想嘅工作差別喺邊。實際上你想像中嘅「想做嘅工」咁理想嘅嘢可能根本唔存在，每份工都會有優缺點，爭在你點樣更加可以同份工嘅缺點相處。
揀選自己嘅強項嚟做工作會有同樣嘅問題：想像得太狹窄。你以為你好叻呢樣嘢，所以會做得好好，但如果比人批評嘅時候，一下子就會跌入低谷。而且你以為自己好勁，但周圍有更多比你勁嘅人。所以揀一份工你嘅能力係平均，喺裡面慢慢進步，一方面由一開始你已經接受好多人勁過你，反差感冇咁大，二嚟當你做到成果嘅時候，果種滿足感係加倍。
咁我哋而家嚟望一下，用咩條件可以揀選到長期做都唔會覺得辛苦嘅工作。
工作時間、工作節奏有幾大程度係你可以決定到？
工作嘅內容同進度可唔可以自己決定？
對於人工、公司嘅決定，你有冇空間提出自己嘅意見？
喺工作中你有冇前進緊，或者進步緊嘅感覺？
有冇 feedback 比你嘅工作？
feedback 同你工作嘅表現、成果匹唔匹配？
工作模式同你獲得動力嘅模式匹唔匹配？（例如 commission or 公司內表揚 ）
佢係對人定唔駛對人嘅工作，而你自己鍾意邊樣？（ I 人定 E 人 ）
你要做嘅嘢、目標、公司嘅計劃清唔清晰？
你知唔知你係按乜嘢可以獲得（更多嘅）報酬？
工作內容有冇變化？
你係咪能夠參與到 project 嘅上中下游？
工作遇到問題時，有冇人會幫你？
同同事係咪同類型人？
多唔多同事似乎 friend 到？
你做嘅嘢有冇 contribution ？
以上 7 個項目，每個人排優先次序都唔同，亦都唔係個個人要考慮哂 7 個。但舉個例咁講，假若你嗜好係畫畫，但你嘅工作係賣保險，你都可能會 enjoy 呢份工多過以畫畫為工作，因為工作時間自由度大啲（工時可以短、可以自己話事）， sell 到單有成功感，清晰點做有幾多佣拆 （啲畫靚唔靚真係好主觀…） ，工作多變 （ sell 唔同客會有唔同挑戰，對比起每日自己對住個芒畫畫 ），（可能有） helpful 嘅同事 （起碼有同事一齊食飯） ，同埋賣到保障幫到人…
以上只係一例，實際如果7個裡面中到3個-4個，即使佢唔係你興趣，份工都已經可以做得好開心。如果你係 team leader ，都不妨睇下你嘅下屬能唔能夠喺你嘅領導之下得到以上 7 樣嘢。祝大家都揾到自己想做嘅工作。