喺今日激烈嘅職場環境入面，單一身份或職業已經唔夠。要儲錢退休，就要多元收入。因此 slash 文化、 gig economy 開始興起。隨住「Slasher」文化嘅興起，越來越多人開始探索喺唔同領域發展、擁有多重身份嘅可能性。 Slash 並唔係收工兼多份受薪嘅工作就叫 slash ，咁樣只係副業， Slash 要兩項或以上差唔多收入，又或者副業收入已經媲美正職先叫 Slash 。筆者已經 slash 咗 5 年，已經返唔到去單一收入嘅年代。
單一職業嘅壞處之一係缺乏多元化嘅收入來源，一旦失去呢份工作，就可能會面對經濟上嘅風險同壓力，做 slasher 就唔會有呢個問題，轉換工作都唔會失去全部收入。呢個當然係好多人覺得做 full-time 嘅最大壞處啦，但對我嚟講，不論做 full-time 定係 part-time 受薪，最大嘅壞處係一個月先出一次糧！我嘅多巴胺根本維持唔到咁耐。做 slasher 真係好好，每幾日又出一次糧，永遠唔會糧尾同缺錢，亦可以一年加無限次人工。另外，單一身份亦有可能導致工作上嘅單調同缺乏挑戰性，令人感到生活缺乏樂趣同成就感。而做 slasher 就唔會厭，因為厭咗就 switch 一個 task ，適合啲 attention span 唔夠長嘅人，例如 ADHD 嘅我。而且，喺唔同領域發展，可以擴闊自己嘅技能同經驗，令自己更有競爭力。做 slasher 仲充分發揮自己。如果你有好多興趣，就有機會充份發揮佢哋，唔會埋沒某啲才華。加上市場變化快速，一味堅持單一職業有機會令自己失去競爭力同發展空間。有一啲發展空間係透過合併技能先行到出嚟，例如寫作+銷售 = copywriting ，教學+銷售=教育機構 sales 等等。喺今個多元化嘅社會，擁有多重身份可以幫助人應對不同挑戰，同時亦可以擴闊個人嘅技能同經驗，令生活更豐富多彩。
如果你亦都想踏上 Slasher 嘅旅程，以下係一啲實用嘅建議，助你由零開始：
喺開始之前，先整理清楚你嘅興趣同擅長嘅技能。呢啲有助於確定你想追求嘅領域同埋點樣喺唔同身份上應用你嘅技能。製作一張列表，寫出你業餘嘅技能，同專業技能，呢啲技能不論大小都會幫到你 slash 。之後要評價你各項技能有幾叻，選出最叻嘅3至5項。以筆者為例，就係補習、寫作、翻譯、銷售。我就唔係好建議大家冇果樣技能但為咗斜槓而學，因為咁樣成本太高，難啲回本同埋怕中途已經想放棄。
如果你諗唔到有咩特別技能，可以從以下幾項入手：
1️⃣ 販售商品
可以喺網上平台賣嘢或者市集攤位度販賣，不過好多人都話喺香港玩市集係平手或蝕，冇賺，租太貴，只係用嚟識新客 r followers ，個客買第二次先有賺
- 二手貨品：賣啲自己唔再用嘅嘢開始，順便斷捨離
- 代購：海外代購/名牌代購/淘寶代購…
- 手作：羊毛氈/織品/花藝/各式小物…
- 批貨：居家用品/服飾…，可以係批發商度搵到貨源，服飾果啲韓國泰國貨源都唔難揾
- 分潤：台灣有蝦皮分潤，香港就業配模式為主，自媒體未到一定 followers 難啲有業配接，可以加入直銷，都係分潤模式
2️⃣ 教學工作
- 新手可以試下較易嘅功輔或者陪玩
- 私補：無論係科目/語言/運動/音樂/藝術…，各種專長都會有私補需求，但除咗科目、語言同音樂之外都比較難做，比人做爛咗個市
- 教班：可以同補習社/社區單位合作，開班教學，重點係以拆帳或 commission 形式而非時薪形式
- 開線上課程：一啲平台例如 YouTube 、 Thinkific 等等都支援創作者上載自己嘅課程，但缺點同樣係要經營自媒體或者社群，自身有一定影響力先推得郁
3️⃣ 接案工作
翻譯/客製繪圖/攝影/寫稿/平面設計/網站建立…
各式各樣嘅工作都可以接案
專業嘅項目通常都有好報酬
就好似我接口譯，每次基本都係幾百蚊一個鐘起跳到幾千蚊一個活動
4️⃣ 模特工作
外貌身材唔錯同活潑嘅男女可以試下：
- 展場模特(SG/SB)：入行後有經驗同人脈，如果你嘅相貌身高係出眾嘅話，可以考慮試下模特工作
- 展場主持：活潑、口才好嘅人適合做展場主持，如果擅長唱歌、跳舞就更加加分
- 平面模特兒：幾年前我做緊嘅時候大約係$400/1小時便服，同私補有差唔多嘅人工，但係都比較攰，同埋仲要P圖同經營社交平台，所以投入要比較高
5️⃣ 自媒體經營
可以經營IG/小紅書/部落格/Youtube…
建議結合自己嘅興趣範疇
一開始可能冇咁多錢，但慢慢積累人氣都可以有廣告收益或者合作機會。
如果你有一定範疇嘅專業知識，例如喺正職度嚟，可以實行知識變現
6⃣銷售工作
- 保險銷售：優點係可以增進自己知識，缺點係要考牌、業績唔能夠累積，第一年佣金最多，第二三年少少，必須不斷跑新單
- 直銷：唔需要太多專業知識，要嘅佢會比你，業績可以累積，比起自家做商品販售嘅優勢係唔駛物色貨源，一般個商品已經好好，但起手需要時間
- 其他銷售合作：我身邊有啲朋友創業，我都自薦幫佢哋做 sales ，唔收底薪淨係 sell 到先拆，咁樣佢哋都會好願意比你幫佢哋 sell ，可以網上陌生認識拓展下呢類機會
Slash 嘅工作多少係要 market 你自己出去，所以你要選擇你剛才所剔嘅技能用咩平台發展。唔同技能可能喺唔同平台發展比較好，所以你要逐個選擇。當然，咁樣亦意味住你要同時經營幾個平台。假設 A 技能適合喺 linkedin 接 job ，B 技能適合 IG ，而你為咗方便自己， A B 都放喺 IG ，咁樣可能導致 A 技能接唔到好多 job 。
上述1, 2, 4, 5 可以使用社交媒體，2, 3 可以使用中介平台，例如 Toby , Upwork , Cakeresume ，2可以兩種都得但好難有心機時間經營哂兩邊。6要陌生認識或者喺自己嘅圈子裡面拓展。
呢個步驟可以幫你驗算 Step 1 同 2 。喺你目標嘅平台搜尋一下你嘅技能多唔多人做緊，做緊咩價錢。多人做緊、有人好成功，都唔代表你要放棄。只係代表你要揾個方法同佢哋有啲唔同，例如換個平台玩。但如果你見到啲價太鹹，建議唔好用呢個技能揾食，因為已經飽和咗冇得做。一個技能賺最多係頭啖湯，不過頭啖湯你應該飲唔到，因為你飲到就唔會睇緊呢篇文。而且開發新市場好難，香港人接受新事物好慢，你會要做好多教育。所以我最 prefer 係做第二啖湯生意，你抄下頭啖湯果個改啲，連平都唔駛平，因為有少少唔同，你同佢一樣價錢賣就得。到第三啖湯已經冇得做，因為一樣嘢改唔到咁多，開始抄到過剩而產生價格戰。
直接喺果個平台揾已經有好多教學。你開 Youtube 就喺 Youtube 揾，開 IG 就喺 IG 揾。因為同打工真係好唔同，所以真係要學嘅，除非你本職已經係 digital marketing 已經駕輕就熟，不過 digital marketing 嘅專才反而要放多啲心機落去諗 product 嘅獨特性果度。
因為 slash 同打工唔同，打工有團隊，你只做你負責果 part ， Slasher 一開始請唔起小助手，每件事都要親力親為。舉例講，你用 IG經營兩項業務，一項係手作貨品，另一項係服務，咁你每日需要出 po 、覆客、計劃生意 (例如嚟緊出咩 product 、服務、折扣)、整貨、寄貨/交收、從事你嘅服務。如果你每日都做齊咁多樣嘢，你啲時間會好碎， task 轉 task 都唔見時間用，所以你就可能要分配例如每日夜晚8-1點覆客，日頭時間星期一用嚟整哂兩個 account 嘅 IG po 同 story ，之後 schedule 逐日掟出去，星期二整貨，星期三服務，星期四寄貨、交收，星期五訂材料，星期六休息 (但都覆客) ，星期日半日計劃生意，半日整貨，等等，令到你時間運用系統化，唔會迷惘。
今日係星期幾，就即刻執行你上述 plan 咗嘅嘢。絕大部份嘅人 slash 唔成功都係因為思前想後開始唔到呢步。
一嚟係一種 warm market 嘅宣傳，二嚟係等有多啲人督促你，半途而廢都瘀皮，增加成功率。而且好嘅朋友可能會比意見你。
喺今個多元化嘅社會裡，Slash 文化同 gig economy 帶動緊唔同身份同收入嘅可能性。如果你都有呢種感覺：『公司唔錯，工作都鍾意，但係偶爾會有啲倦怠。假日嘅時候，有特別嘅興趣同愛好。』 咁你嘅內在可能都係一個斜槓人。有著無窮潛力，等緊你去發揮。透過多元發展，我哋唔單止可以應對唔同挑戰，亦可以擴闊自己嘅技能同經驗，令生活更加豐富多彩。不如諗諗佢，唔好再打工啦！
延伸閱讀：